UKA 2001/78
Inatsisartuni Naalakkersuisunilu il.il. ilaasortat aningaasarsiaqartitaanerat il.il. pillugit Inatsisartut inatsisissaattut siunnersuut
pillugu
Inatsisartut Inatsisit Atortinneqarnerannut Ataatsimiititaliaata
ISUMALIUTISSIISSUTAA
siunnersuutip aappassaaneerneqarnerani saqqummiunneqartoq
Inatsisartut Inatsisit Atortinneqarnerannut Ataatsimiititaliaat suliarinninnermini ukuninnga inuttaqarpoq:
Inatsisartuni ilaasortaq Anders Andreassen (Siumut), siulittaasoq
Inatsisartuni sinniisussaq Paninnguaq Olsen (Inuit Ataqatigiit), siulittaasup tullia
Inatsisartuni ilaasortaq Lars Karl Jensen (Siumut)
Inatsisartuni ilaasortaq Godmand Jensen (Atassut)
Inatsisartuni ilaasortaq Anthon Frederiksen (Kattusseqatigiit)
Inatsisartut Inatsisit Atortinneqarnerannut Ataatsimiititaliaanni amerlanerussuteqartut, tassaasut Siumut aamma Atassut siunnersuut pillugu ima oqaaseqassapput:
Siunnersuutip ilaa pingaarneq tassa Inatsisartuni ilaasortat aningaasarsiaasa qaffaavigineqarnissaat.
Inatsisartut aningaasarsiaat qinikkatut suliaqarnermi akisussaassusermut, Inatsisartunilu ilaasortat suliakkersorneqarnerannut atugarisaannullu allanut naleqquttumik inissisimasariaqarput.
Inatsisartuni ilaasortat suliakkersorneqarnerat ukiuni kingullerni annertusiartorpoq.
Kalaallit Nunaata qinersivinngorsimanera ataasiinnaq namminermi Inatsisartuni ilaasortat naalakkersuinikkut sulinerannik annertusisitsisimavoq, Inatsisartunimi ilaasortaq nunatsinni tamarmi qinersisartunik attaveqarfiginnittariaqalersimammat.
Tamatuma peqatigisaanittaaq Inatsisartut ataatsimiittarnerisa avataatigut ataatsimiititaliat sulinerat annertusisimavoq, Inatsisartullu ataatsimiinnerisa nalaani suliakkersorneqarneq suli annertoqaluni. Ataatsimiititaliami amerlanerussuteqartut naatsorsuutigaat taamatut ingerlaaseqarneq ukiuni aggersuni suli malunnarnerulissasoq.
Inatsisiliortuunermit isigalugu tamanna pissusissamisoortuullunilu pitsaasumik ineriartorneruvoq. Inatsisartut ataatsimiititaliaat Inatsisartut Suleriaasiat naapertorlugu susassaqarfimmik iluini ineriartornermik malittarinnittussaatitaapput, Naalakkersuisullu ingerlatsinerminni inatsisitigut killiliussanik malinninnersut nakkutilliivigisussaallugit, imaluunniit ingerlatsinertik ileqqorissaartussaaneq innimigalugu ingerlanneraat. Tamatuma nassatarissavaa Inatsisartut Ataatsimiititaliaasa Inatsisartut ukiorisaat kaajallallugu sulisarnissaat.
Suliakkersorneqarnerup annertusiartornera aningaasarsiat qaffaaviginerisigut illua tungiliivigineqartariaqarpoq.
Siunnersuut saqqummiunneqartoq atorlugu Inatsisartut aningaasarsiaat nunatsinni kommunini mikinerni borgmesterit aningaasarsiaannut qanillattortinniarneqarput. Ataatsimiititaliami amerlanerussuteqartut isumaqarput Inatsisartuni ilaasortat suliakkersorneqarnerannut, taamalu akisussaassutsimik tigumiaqarnerannut atugarisaannullu allanut tunngatillugu, taamatut annertussusiliineq naleqquttutut isigisariaqartoq.
Siunnersuutip immikkoortui allat pillugit ataatsimiititaliami amerlanerussuteqartut Inatsisartuni ilaasortat Nuummi najugassinnissamut periarfissinneqarnissaannik siunnersuut immikkut taaniarpaat, soorluttaaq Inatsisartut ataatsimiittarnerinut atatillugu aapparisap qitornallu ingiallortigineqarnissaannut periarfissaq pitsaanerulersinneqassasoq. Ataatsimiititaliami amerlanerussuteqartut naliliipput tamatuma Inatsisartut ataatsimiittarnerisa piffissaq atorneqartartoq eqqarsaatigalugu sivitsuiffigineqarnissaa periarfississagaa, inatsisiliortutullu sulineq taamaalillugu patajaallisaavigalugu.
Siunnersuutikkuttaaq Inatsisartuni ilaasortat nunatsinni paasisassarsiorlutik angalasinnaatitaanerat annertusineqassaaq. Tamanna ataatsimiititaliami amerlanerussuteqartut pitsaasutut isigaat. Qinersisarnermut inatsisip allanngortinneqarneratigut Kalaallit Nunaat qinersivinngorsimavoq ataasiinnaq, tamatumalu pisariaqalersippaa Inatsisartuni ilaasortat qinersisartunik attaveqarnerisa, nunallu immikkoortuini ataasiakkaani pissutsinik atuuttunik paasisassarsiorsinnaanerup, pitsaanerulersinneqarnissaat.
Taama oqaaseqarlutik ataatsimiititaliami amerlanerussuteqartut siunnersuut akuersissutigineqassasoq inassutigaat.
Ataatsimiititaliami ikinnerussuteqartut, tassaasut Inuit Ataqatigiit aamma Anthon Frederiksen, Kattusseqatigiit, siunnersuut pillugu ima oqaaseqassapput:
Ataatsimiititaliami ikinnerussuteqartut siunnersuutip immikkoortui arlallit isumaqatigaat:
Ataatsimiititaliami ikinnerussuteqartut taamaalillutik pitsaasutut isigaat nunatsinni paasisassarsiorluni angalasinnaanerup pitsanngorsaavigineqarnissaa. Tamanna Kalaallit Nunaata tamarmi maanna qinersivittut ataasiinnanngorsimaneranut pissusissamisoortumik kinguneqaataavoq. Paasisassarsiorluni angalasinnaanerup annertusineqarneranut periarfissiisoqarpoq Inatsisartuni ilaasortat qinersisartunut attaveqarnerisa annertusarneqarlunilu ataavarnerusunngortinneqarnissaanut.
Ataatsimiititaliamittaaq ikinnerussuteqartut isumaqatigaat Inatsisartuni ilaasortat ullormusiaqarsinnaatitaanerisa aningaasartuutinut matussutissanik tapisiaqarnerup annertusineqarneratigut atorunnaarsinneqarnissaat. Tamanna allaffissornikkut oqilisaanermik kinguneqartussaavoq, tamannalu ataatsimiititaliami ikinnerussuteqartut pitsaasutut isigaat.
Aamma ataatsimiititaliami ikinnerussuteqartut pitsaasutut isigaat siunnersuuteqarnikkut Inatsisartuni ilaasortat Inatsisartut ataatsimiinnerisa nalaani meeqqaminnit najorneqarsinnaanerat pitsaanerulersinniarneqarmat.
Ataatsimiititaliamili ikinnerussuteqartut isumaqatigisinnaanngilaat Inatsisartuni Naalakkersuisunilu ilaasortat aningaasarsiaasa siunnersuutikkut taama angitigisunik qaffanniarneqarnerat.
Aningaasarsiat qaffaavigineqarnissaattut siunnersuut inuiaqatigiinni akissarsiatigut ineriartornermut nalinginnaasumut qaffasinnerunermigut sanilliunneqarsinnaanngitsoq piffissami aningaasaqarniarnerup ajorsiartorfigisaani, aalisarnerup ajornartoorfiani namminersornerusullu sulliviutaanni arlalinni annertuunik ajornartorsiuteqarfiusumi Namminersornerullutik Oqartussat piumaffigineqarput sipaaruteqaqqullugit, tamannalu innuttat ilaannut arlalinnut, ilaatigut assersuutigalugu ilinniagaqartunut atugarisatigut ajornerulersitsisoq, illersorneqarsinnaanngilaq.
Ataatsimiititaliamittaaq ikinnerussuteqartut akuersaarneqarsinnaanngitsutut isigaat Inatsisartut siulittaasuata tulliisa kiisalu Aningaasaqarnermut Ataatsimiititaliami aamma Kukkunersiuinermut Ataatsimiititaliami ilaasortat immikkut aningaasarsianik tuniniarneqarnerat. Taamaammat Inatsisartut aningaasarsiaasa taamatut annertutigisumik qaffaavigineqarnerat eqqarsaatigigaanni ataatsimiititaliami sulinermik isumaginninnissamut immikkut aningaasarsiaqartitsinissaq tunngavissaqanngilaq.
Taamaammat ataatsimiititaliami ikinnerussuteqartut inassutigaat siunnersuut itigartinneqassasoq.
Anders Andreassen, Siumut
ataatsimiititaliap siulittaasuaPaninnguaq Olsen, Inuit Ataqatigiit Lars Karl Jensen Siumut
Godmand Jensen, Atassut Anthon Frederiksen, Kattusseqatigiit